Plantun de Prouvènço

Pèr coumpara dos planto d'encò nostre

Sonchus tenerrimus & Nicotiana glauca

Cardello(-de-paret)

Sonchus tenerrimus

Asteraceae

Àutri noum : Cardello, Lachenco, Lacheiroun.

Nom en français : Laiteron délicat.

Descripcioun :
Aquelo cardello, coume tóuti, fai de la un cop coupado (lachenco). S'atrobo sus li paret de roco e proche de la mar. Se destrìo de si cousino Sonchus asper e Sonchus oleraceus qu'a li fueio proun retaiado en fuioun óupousa (vèire la fotò). Lou pèd de la flour coumpausado èi cubert de fèutre blanc. Es uno planto qu'es en trin de remounta long dóu Rose.

Usanço :
Pòu rintra dins la coumpousicioun de l'ensalado champanello, pamens, pèr nautre, èi pas ço que i'a de meiour. S'èi retrouba dins la planto de lactono sesquiterpèno que pourrien ajuda à lucha countro lou plasmodium, aquéu que douno lou paludisme.

Port : Erbo
Taio : 40 à 150 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Sonchus
Famiho : Asteraceae

Tribu : Cichorieae

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Printèms - Estiéu - Autouno - Ivèr

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero

Liò : Champ - Paret - Mar
Estànci : Termoumediterran à Mesoumediterran
Couroulougi : Pancaro entresigna
Ref. sc. : Sonchus tenerrimus L., 1753

Taba(-verdau)

Nicotiana glauca

Solanaceae

Noms en français : Tabac arborescent, Tabac glauque.

Descripcioun :
Lou taba-verdau es un aubret que trachis au nostre dins li fendasclo di vièi paret e de roucas. Nous vèn d'Americo dóu miejour (Argentino) ounte se vèi fin qu'à 3 700 m d'auturo. Se recounèis à si fueio pourtado pèr un long pecou e verdalo coume la tijo peréu bluio, e tambèn bonodi si lòngui flour jauno en tube.

Usanço :
Emai aguèsson pas li mémi prouprieta qu'aquéli de Nicotiana tabacum, li fueio seco soun fumado pèr lou pople "Quechua" alor que li "Cahuilla" se n'en sèrvon en emplastre pèr garri li plago, li macaduro e li fleiroun, e pèr sougna lis enflige (edèmo). Mèfi de n'en pas manja li fueio, soun mourtalo ! La decoucioun de fueio, richo en nicoutino e anabasino (alcalouïde), pòu servi dins l'ort pèr tua li nieroun.